Schwoba zom Nohopfa

Schwoba hen no nie lang braucht, neie Technika praktisch ozomwenda. Mit'em Indernet isch des net andersch. Weil's Schwoba net bloß em Ländle gibt, sondern uff dr ganza Welt, isch a globale Plattform scho lang ieberfällig gwä. Dass'es Kommuniziera ibers Indernet net bloß schnell sondern au billig isch, hot letschendlich fir a große Akzeptanz bei älle Schwoba gfiehrt.

Die brenget's älles zsamma: d'Schwobakonnektschn

Dr ideale Ausgangspunkt firs Netzhopfa isch d'Schwobakonnektschn. Zom oina hen die scho an Haufa Webseita uff ihrer Lischte, die wo was mit schwäbisch zom do hen. Zom andra gibt's do au 's Schwobaforum, wo mr mit andere Schwoba iber d'Kehrwoch fachsimpla ko oder Rezeptla fir schwäbische Spezialitäta austauscha. Dass Schwoba tolerant sen, ko mr do drbei uff's neie entdecka, weil die nämlich au uff hochdeitsche Ofraga nett on freindlich antworta.

Kernfraga des schwäbischa Seins: wo gibt's die beschte Brezla?

Wer kennt des Problem net: Kaum dass mr mol's Ländle verlässt, kriegt mr Glischt uff a guate Brezel! Aber wo kriegt mr en New York, Sidney oder gar Berlin a gscheite Brezel her? Die Frog hat scho Generationa von schwäbische Urlauber on Auswanderer beschäftigt, ond des tut se heit no, was mr deitlich säha ko ,wenn mr en's indernationale Laugebrezl-Forum neiguckt. Fachleit aus älle Herra Länder diskutieret do wie a optimale Brezl sei muss (reesch nadierlich) on geba sich gegaseitig Tipps wo mr se herkriega ko. A Muss vor jedra Auslandsreise!
Nachtrag:
Leider isch's originale Laugebrezl-Forum kommentarlos offline ganga! Oine von de letschte Versiona mit de meischte Tipps ko mr zom Glick wenigschtens no bei Archive.org fenda.
Ganz nei isch Laugenbrezel worldwide, wo sich als Nachfolger obietet!

Au amtlich net schlecht: 's Ländle em Netz

Die offizielle Seita vom Ländle, www.baden-wuerttemberg.de, bietet Schwoba on solche wo's werda wella, an Riesahaufa Informationa. Mr ko sich zom Beispiel informiera, was mir hier studiera oder schaffa ko, wo mr Urlaub macha ko, on was fir leckera schwäbische Spezialiäta mr do verbutza ko. An guter Ausgangspunkt fir eigene Nachforschunga, au wenn's natürlich net speziell om Schwoba, ondern om Bada-Wirttaberg goht.

No net gnug? 's ganze Indernet schwätzt schwäbisch!

Dr Schwobifying Proxy von UNiMUT, dr Zeitong von dr Uni Heidelberg, macht's meglich on iebersetzt jede deitsche Webseite in a schwäbische. Damit isch bewiesa: Es steckt an Schwob in jedem von ons!

Gottfried Geggele