Leserbriefla

Reklame.

Äll Dag, dò leerscht dein Kaschtà aus,
ond was für Gruscht kommt dàbei raus.
Mäblblädr, Riesàdenger,
abr d Schdualfias werdet au net länger.
Heizkörb’r au Radiadorà gnannd,
dià griagscht heit jò, em ganzà Land,
wennd dr Preis siehsch, nò wirschd arm,
deine eigene gebàt grad so warm.
À neue Mode gibt’s jetz au,
wer IN isch, der kauft donkelgrau,
au kaas nò lilablassblau sei,
egal was`d drechsch, s isch oinerlei.
Jetz flattèret à Auto dir ens Haus,
von oiner Firma, s ischt à Graus.
Mindeschdens zeàh Ausfierongà,
vor fufzeh Jàhr han i doch mein scho gnommà.
So lang sott so à Schlittà haldà,
deshalb, b`hald i halt mein Altà.
S nägschde Bläddle, dò muasch guckà,
dò muasch z erscht à mòle schluckà,
von dr Beate Use kommt so à Wisch,
dass dà ganz schee uffgregt bisch.
Uff oimàl kommt à Hauptgwenn à,
fenfdausend Mark für jeden Mà.
Wenn d nàchfràgscht nòch dem scheenà Geld,
nò griagscht erscht nex, dò bisch gschdellt.
Vom Hobby-Markt kommt au a Blatt,
weil der so viele Sachà hòt.
Dià kennt mr zwar scho älle brauchà,
doch dät des mei Eta z’arg schlauchà.
So isch mei Briefkaschtà dauernd voll
ond dàbei isch mir’s gar net wohl,
denn jeder schreit vom Waldabholzà
ond drotzdem den’d se weiterbolzà.
Letschtjòhr han i s oimòl gwogà,
an oim Dag, s`isch net vòrlogà,
neihondert Gramm, s send fascht zwoi Pfond,
blos so, so gòht dui Wirtschaft rond.
Wenn`d nò oin frògsch, waròmm des Zeig ?
Ha, weil’s nò viel Beschäftigung geit !
Deshalb fliagt d`r ganze Kruscht,
weil`s sowiso net lesà duascht.
Wegà deàm schmeischd ällàs naus,
nò hòsch nehmlich nix em Haus.

Jetzt will i au amol was zom beschda gebba, nochdem ich scho a Zeit lang bei eich mitglesa hab, also, bassed guat auf:

Em Herbschd isch ja Besazeit ond do gibts sich emmer wieder, dass sich do Leit an oim Disch treffat, die sich vorher no nie gsea hen. Sitzet amol a paar Stuagerter zamma ond kommet noch am dritte, vierta Virtele ens Angeba nei. Der aus Degerloch sagt, "ha mir senn doch die Beschde, denn onser Fernseturm isch doch's Wahrzeicha von der ganza Stadt". "Ha no, ha no, ganz langsam", sagt der aus Zuffahausa, "was die ganza Welt von Stuargert kennt, senn mir ond onser Porsche". "Ihr emmer mit em Porsche", sagt der Ondertürkheimer, "es gibt nix scheners als an Daimler". "Daimler oder Porsche, wo wäret ihr denn wenn ons ond onsern Bosch net gäb?" frogt der Feuerbacher. So sitzet se älle rom on jeder isch der Beschde. Blos der oine aus Zazahausa sagt nix ond schlozt an seim Viertele. "Ja was isch denn mit eich? froget ihn die andere, "was henn denn ihr?" Do lehnt sich der Zazahäuser zrick, nemmt an Schluck von seim Trollinger und sagt, "Mir? - mir hens sche!"

Viele Griaß an die andere Stuargerter aus am schenschda Dörfle em Stuargerter Norda

Wiedr mòl ebbàs richdig schwäbischs !
Des glaubsch net, abber i schreib au schwäbische Gedichtlà.
Dià fendesch uff meiner Hompeitsch:

home.feierabend.com/remstal

z.B. über schwäbisches Misstrauen:

Bankbesuch.

Dr Karle got uf Dahrlehnskass
seine Händ send scho ganz nass.
Am Schalter frógt `dr ganz bescheida,
kaascht du mir mei Konto zeiga?
Der Beamte ganz beflissa,
hot sei Geldschublad uff-grissa
ond frogt dr`Karle, wia viel brauchatse?
Gibscht mr ällas, des wär schee.
Sei ganz Konto isch jetzt leer,
uf dr Bank, do isch nex mehr.
Er zählt nóch, an jeda Schei,
a-bar Münza send au dr`bei.
Noch a ma Weile secht er knitz,
jetzt kriagscht sofort den ganza Blitz.
Der Kassawart guckt ganz fruschtriert,
dr Karle hot sich net schenniert,
er hot ehm gsagt, jetzt sei er froh,
sei ganzes Geld, isch jo no do!
So hot er sich des et vorgschellt,
das die sei ganzes Geld no hent .

Sehr geehrter Herr Geggele,

Ihre Website ist einfach klasse! Hätten wir Kölner nicht besser machen können.
Nun habe ich aber eine Bitte an Sie:

Es gibt den Ausspruch "Ja, hast Du denn nichts zu Schaffen" (im Sinne von arbeiten).
Können Sie mir mitteilen, wie dieser Satz im Schwäbischen geschrieben wird?

Im voraus herzlichen Dank für Ihre Antwort!

Mit freundlichem Gruß,
Harald Koch